Live chat-ի մի քանի առավելություն, որոնց մասին պետք է հիշել

Օնլայն գնումներն ունեն մի շարք առավելություններ․ դուք այստեղ ստիպված չեք հերթ կանգնել, կարող եք գնումներ կատարել աշխատանքից հետո՝ տան հարմարավետ բազմոցին նստած և չսպասել, թե երբ կբացվի քաղաքի մյուս ծայրում գտնվող խանութը։ Սակայն կա մի բայց․ մեզ սովոր խանութներում օգնության հասնող խորհրդատու-վաճառողներն այստեղ չեն, և երբեմն դժվար է գտնել այն, ինչ փնտրում ես։ Մեր օրերում այս հարցը կարելի է հեշտությամբ լուծել լայվ չատի օգնությամբ։ Էլ չենք խոսում ավտոմատացված չատբոտերի մասին։ Այս գործիքները, հավատացեք, կօգնեն, որ ձեր հաճախորդները ավարտեն գնումը հենց ձեր կայքում ու չգնան ավելի հեշտ տարբերակներ փնտրելու։

Իսկ ի՞նչ է պետք անել արդյունավետ օնլայն սպասարկման համար։ Մինչ այս հարցին պատասխանելը եկեք խոսենք այն կարևոր առավելությունների մասին, որ ունի լայվ չատը։

 

 

Հաճախորդների արագ սպասարկում

Ժամանակին հետաքրքրող հարցերին պատասխան ստանալու համար հաճախորդները ստիպված էին գրել էլեկտրոնային նամակ կամ զանգել ու սպասել, մինչև հեռախոսավարներից մեկը (կամ միակը) կպատասխաներ զանգին։ Այսօր էլ կան բիզնես մոդելներ, որոնց դեպքում այս տարբերակները դեռ գործում են, բայց արդյունավետության և արագության համար անհրաժեշտ է ունենալ օնլայն սպասարկման հնարավորություն։ Համաձայնեք, որ միայն այն միտքը, որ պետք է սպասել զանգերի հերթում կամ անվերջ թարմացնել էլ․ փոստի նամակները կարող է հետ պահել գնումներ կատարելուց։

 

Հաճախորդները շատ արագ են որոշումներ կայացնում։ Տրամադրելով օնլայն սպասարկման հնարավորություն՝ դուք բարձրացնում եք գնումների հավանականությունը և տալիս վստահության զգացում, որ պատրաստ եք պատասխանել առաջացած ցանկացած հարցի։ Եթե նույնիսկ վստահ եք, որ ձեր կայքը շատ պարզ է և ինտուիտիվ, միևնույնն է փորձեք ամեն պահի հասանելի լինել հաճախորդների համար։

 

 

Ժամանակի և ծախսերի օպտիմալացում

Իրական խանութում կամ հեռախոսով այսպես հնարավոր չէ, բայց օնլայն կարելի է սպասարկել միաժամանակ մի քանի հաճախորդի։ Լայվ չատ տրամադրող հավելվածները հիմնականում թույլ են տալիս տեսնել հաճախորդի տվյալները և հեշտությամբ հասկանալ իրավիճակը։ Կարևոր է նաև այն, որ այսպիսի հավելվածներում կան ֆիքսված պատասխաններ ողջույնի և պարզ հարցերի համար, որոնք խնայում են աշխատակցի ժամանակը և թույլ տալիս կենտրոնանալ ավելի լուրջ հարցերի վրա։ Ավելին, դուք կրճատում եք հաճախորդների սպասելու ժամանակը, որը կարևոր է ոչ միայն սպասարկման, այլ նաև վիճակագրության և արձագանքների համար։

Այսպիսով, ձեր հաճախորդներն ստանում են արագ պատասխաններ, անհրաժեշտության դեպքում կապվում սպասարկման աշխատակցի հետ և ստանում անհրաժեշտ հարցերի պատասխանները։ Իսկ աշխատակիցներն, իրենց հերթին, ստիպված չեն լարվել սպասողների հերթի կամ դժգոհ հաճախորդների «հարձակումների» պատճառով։

Այս ամենի համար ձեզ պետք է փոքր թվով աշխատուժ և կայքին ինտեգրված որակյալ հավելված։

 

 

Վստահություն բրենդի նկատմամբ

Մեր բլոգում արդեն խոսել ենք անձնական բրենդի հաջողության կարևոր գործոնների մասին։ Կատարելով բոլոր անհրաժեշտ քայլերը՝ պետք է չմոռանալ սպասարկման որակի մասին։ Ձեր բրենդը հաճախորդին ներկայանում է նաև սպասարկման միջոցով, և այստեղ պետք է հիշել հաճախորդակենտրոն բարդ բառի մասին։ Ինչպես արդեն նշեցինք՝ բիզնեսի կենտրոնում պետք է լինեն հաճախորդը և իր պահանջները։ Արագ լուծումներ փնտրելիս համոզվեք, որ ապահովում եք նաև այնպիսի սպասարկում, որին արժանի են ձեր հաճախորդները։ Հայկական շուկայում դեռ հանդիպում են անձնական նամակով ինչ-որ գաղտնի տեղեկություն ուղարկող բիզնեսներ, բայց այս ոլորտն արագ տեմպերով զարգանում է։ Երևի կհարցնեք՝ ի՞նչն է հաճախորդի մոտ վստահության զգացում առաջացնում։ Եթե ասենք մեկ բառով, ապա դա հոգատարությունն է։ Անգամ ամենապարզ հարցին ձեր սիրալիր պատասխանը կարող է մեծացնել գնումների հավանականությունը։ Ի դեպ, որոշ հետազոտություններ փաստում են, որ այն հաճախորդները, ովքեր մինչև գնում կատարելը ստանում են հուզող հարցերի սպառիչ պատասխաններ, ավելի են հակված մեծ գումարի գնում կատարելու։

 

Ապահովելով որակյալ օնլայն սպասարկում՝ դուք կապահովեք հավատարիմ հաճախորդների մի մեծ խումբ, ովքեր ոչ միայն կվերադառնան նոր գնումների, այլ նաև կպատմեն ձեր բրենդի մասին ընկերներին։ Իսկ իդեալական փորձառության դեպքում, հավատացեք, նրանք պարզապես կհամոզեն ընկերներին օգտվել ձեր ծառայություններից։

 

Դե ինչ, մտապահելով այս բոլոր օգտակար կողմերը՝ անցնենք այն գործիքներին, որոնք կօգնեն բարձրացնել սպասարկման արդյունավետությունը ձեր կայքում։

 

 

1․ Փորձեք ընտրել լայվ չատի արդյունավետ գործիք

Ucraft-ի Ինտեգրացիաներ էջում կարող եք տեսնել այն բոլոր հավելվածները, որոնք կարող եք հեշտությամբ կցել ձեր կայքին և օգտագործել ոչ միայն լայվ չատի, այլ նաև վերլուծությունների, էլ․ նամակների և հաճախորդների հետ կապի այլ ձևերի համար։ Մոտ 10 ինտեգրացիաների շարքում կարող եք գտնել Messenger, Intercom, HubSpot, Hoory, Zendesk և այլ գործիքներ։ Մինչ ակտիվացնելը փորձեք ուսումնասիրել բոլոր տարբերակները և գտնել հենց այն, որը լավագույնս կաշխատի ձեր բիզնեսի և հաճախորդների համար։ Կցեք հավելվածը կայքին և տվեք գնորդներին ձեզ հետ մեկ հպումով կապ հաստատելու հնարավորություն։

 

 

2․ Ավտոմատացրեք լայվ չատի աշխատանքը

Մեր օրերում ավտոմատացումը կարող է օգնել գնման բոլոր փուլերում։ Չատբոտերը հեշտ տեսանելի են և կարող են խմբագրվել ձեզ անհրաժեշտ ձևով։ Եթե նույնիսկ չեք կարող ապահովել շուրջօրյա սպասարկում անձնակազմի կողմից, ապա ավտոմատացված բոտերը կօգնեն սպասարկել հաճախորդներին 24/7 ռեժիմով։ Եթե մի փոքր ուսումասիրեք ձեր հաճախորդների վարքը և պահանջները, ապա արդյունքներն ավելի տեսանելի կլինեն։ Սպասարկման ավտոմատացումը նույնպես կարող է խթանել վաճառքը և բարձրացնել կայքի ակտիվությունը․ չէ՞ որ ամեն ինչ ձեռքի տակ է և արագ։

 

 

3․ Օգտագործեք վերլուծական տվյալները

Ինչպես շատ այլ հարցերում, այստեղ էլ վերլուծական տվյալները կարևոր են ու օգտակար։ Լայվ չատը ևս մեկ գործիք է, որն օգնում է հասկանալ հաճախորդների պահանջները, դուրս բերել հիմնական խնդիրները և տրամադրել ավելի ճշգրիտ պատասխաններ։ Պատկերացրեք, եթե սովորական խանութում հնարավոր լիներ հիշել բոլոր հաճախորդներին, երբ են նրանք սիրում գնումներ կատարել և ինչ նախասիրություններ ունեն։ Իհարկե, դժվար կլիներ։ Այս դեպքում դուք կարող եք անհատական սպասարկում ցույց տալ կայքի յուրաքանչյուր այցելուի՝ հիմնվելով նախկինում կատարած գնումների, հաճախ բացված էջերի և այլ տարբեր տվյալների վրա։ Դե իսկ նոր հաճախորդների համար կարող եք ունենալ ուղղորդող նամակներ։
Եթե արդեն ստեղծել եք ձեր կայքը Ucraft-ով, ապա շտապեք կցել նաև վերլուծական գործիքներ, որոնք կարող եք գտնել Ինտեգրացիաներ հավելվածում։ Տվյալները կարող են ձեր ամենահուսալի օգնականները դառնալ։

 

Հաճախորդների սպասարկման նրբությունների, դրական կողմերի և դժվարությունների մասին կարելի է անվերջ խոսել։ Բայց կարևորն այն է, որ գտնեք շփման ձեր արդյունավետ եղանակը և մշտական կապի մեջ լինեք հաճախորդների հետ, ում ընտրությունը հենց ձեր կայքի վրա է կանգնել։ Հաճելի ու դրական փորձառությունը միշտ ստիպում է վերադառնալ նոր գնումների հետևից։ Իսկ ձեզ մնում է միայն զարգանալ, խթանել վաճառքները բոլոր հնարավոր միջոցներով և չմոռանալ շնորհակալ լինել ձեր ամեն հաճախորդին։

 

Ու վերջում չմոռանանք հիշեցնել, որ կարող եք ցանկացած հարցի դեպքում կապ հաստատել մեր աջակցման թիմի հետ՝ պարզապես սեղմելով լայվ չատի կոճակին։ Ձեզ մաղթում ենք նոր հետաքրքրասեր հաճախորդներ ու մեծ վաճառքներ։